司徒華點滴

司徒華點滴
左丁山

司徒華逝世後，好多佢嘅生前「秘密」逐漸曝光，一人講一句，加加埋埋，就知道司徒華對各方面都有影響力，譬如港大教育學院程介明教授係港大教育學院支柱之一，對港大甚有助力，但根據教授所言（信報一月七日），一九八四年三月他在倫敦讀博士待業之時，港大應承同佢簽三年加三年嘅教書合約，而中大教育學院院長杜祖貽親自打電話搵佢，請佢入中大做「長工」。一般新科博士為安定前途計，一定推掉合約工嘅，但程博士問司徒華攞意見，司徒華就寫信勸佢應聘港大，為港大教育學院添點心血，因為中大教育學院已與外界接觸多，氣氛活躍喎！程博士於是就回母校港大任教，改變了部份香港教育史。

六四後香港支聯會有拯救民運人士行動，代號係黃雀行動，左丁山知識淺薄，成日以為係「螳螂捕蟬，黃雀在後」，即係公安拉人，支聯會黃雀在後救人咁解。亞洲週刊訪問黃雀行動負責人陳達鉦問及「黃雀行動」之命名來由，陳先生即刻背出曹植「野田黃雀行」：「……羅家見雀喜，少年見雀悲，拔劍捎羅網，黃雀得飛飛……」黃雀行動就係「黃雀得飛飛。飛飛摩蒼天，來下謝少年」咁嘅意思，係熟讀詩書嘅司徒華採用嘅，哎吔，此詩在中學時讀過，竟然忘記晒，寧不慚愧？

呢幾日睇咗不少司徒華嘅資料，最令左丁山佩服者就係司徒華老早諗到為教協開源、搞財政獨立嘅妙計，就係辦好「教師超市」，以賺錢養教協，多年來辦得相當成功。一般老師不懂做生意，也視生意為庸俗，即使要做，都會辦得唔湯唔水，但教協在司徒華領導下，就懂得在呢方面與現實妥協。左丁山同教協有一次咁多嘅交手經驗，與神童輝搵華叔傾合作，華叔叫我地同一位郭老師談判，呢位郭老師好懂得為教協爭取利益，連神童輝都評論一句：「乜老師咁識講數吁架？」就因為華叔辦社運嘅策畧，就係首先鞏固教協財政，不倚賴他人捐款，教協先至可以多年來企得咁硬啫。

（原刊二０一一年一月十日《蘋果日報》）