花果飄零

新亞早期史
左丁山

商務印書館董事總經理陸國燊博士係新亞歷史系畢業生，得雅禮協會獎學金到哈佛攻讀博士學位。在美國、日本做過十幾年賓架，後來俾新亞師弟陳萬雄博士遊說轉行，入咗商務，再轉入中大做中大出版社社長，退休後重返商務擔大旗，在出版界之中，史提芬．陸嘅學歷夠晒高。平時史提芬久唔久就送本新書畀左丁山睇，此日收到一本，一睇名稱，已經充滿新亞 feel，就係《花果飄零》，副題係：「冷戰時期殖民地的新亞書院」，十分學術味噃，真係啱晒陸國燊呢位校友。作者係周愛靈，夏威夷大學博士（中國思想史），現嶺南大學歷史系助理教授，研究香港及中國文化。嶺大歷史系在劉智鵬教授推動下，主力研究香港史，編撰地方誌，及香港世家家族史，成績斐然，故此周教授在嶺大歷史系任教，研究香港，啱晒波路。

原來本書係英文，由羅美嫻博士譯作中文交畀商務出版，作者與譯者都唔係新亞畢業生，但對新亞早期歷史用心研究，難得之至，可見新亞書院歷史已成為香港文化史一個重要部份，故此周博士寫博士論文時，就以新亞歷史為題材。

左丁山自問對新亞歷史比較熟悉，但周教授以學術論文方法寫新亞史，認識比左丁山深入好多，佢參閱大量歷史檔案，除新亞圖書館與新亞研究所之外，仲到過耶魯、史丹福、亞洲協會、雅禮協會、福特基金會、哈佛燕京學社、香港政府檔案館、英國國家檔案館等等地方搜尋資料，發掘出一啲事實，係我地前所未聞嘅，例如新亞校慶何以定九月廿八日（孔子誕）？

《花果飄零》第四章寫新亞書院加入新大學（中文大學）之前，提到港督柏立基及教育司要求新亞政治中立，唔好在農圃道校內懸掛青天白日旗，正式要求新亞下一個決定。柏立基寫畀英國殖民地大臣嘅電文話：「我們不能永遠去接受在經濟上支持一所看來是積極同情台灣國民黨的學院」，新亞書院就是不肯，只願意將十月十日校慶日改為九月廿八日，以示政治中立。呢件事情卒之拖拖拉拉，港英始終不敢將新亞排除在新大學之外。以左丁山所知，新亞到咗一九六九年十月十日之後，先至受到龐大政府壓力，不再掛青天白日旗。「花果飄零」一書，值得新亞人一讀，粗閱之下，左丁山發覺響 102頁有查理朗一人。其實佢有個中文名字，就係郎家恆，係英文名 Charles Long繙譯過嚟嘅。

（原刊二０一０年十二月十七日《蘋果日報》）